Google+ Google+

TRADUEIX / TRANSLATE

dimecres, 10 de maig del 2017

Lo Parlament de Catalonha demanda que se pòsca aprene l’occitan dins los centres d’educacion segondària del país

Los deputats an aprovat una mocion qu’exigís de garentir los dreches lingüistics dels parlants de catalan e d’occitan, e que concretiza d’accions dins l’encastre del cinèma, de l’administracion publica, de la santat e de l’educacion



Lo Parlament de Catalonha aprovèt la setmana passada una mocion que demanda al govèrn de la Generalitat de garentir los dreches lingüistics dels parlants de catalan e d’occitan, e que s’apliquen las leis de proteccion d’aquelas doas lengas minorizadas, dont la lei del cinèma, la lei del còde del consume o la lei de l’occitan.
 
L’objectiu d’aquela mocion es mai que mai de metre fin al “victimisme deth castelhan”, çò diguèt la deputada aranesa Mireia Boya, qu’en nom de la CUP presentava lo tèxt, e o fasiá en occitan. “Catalan e occitan son es dues lengües minorizades en aguest país peth poder”, çò precisèt en tot “constatar” que lo govèrn de la Generalitat “pòt hèr molt mès de çò que hè enes actuaus politiques lingüistiques que met en plaça”.
 
La mocion demanda que se complisca la lei qu’establís qu’almens la mitat dels filmes se pòscan seguir doblats o sostitolats en catalan, e demandan que se promòga lo sostitolatge dels filmes estrangièrs en catalan e en occitan per mejan de la concession prioritària de subvencions.
 
Per rapòrt a l’occitan, la mocion exigís de “garentir es drets lingüistics des occitanofòns”. Per ansin se demanda que catalan e occitan ajan la meteissa valor per calcular los meritis dels foncionaris, que totes los formularis en papièr o electronics de l’administracion sián tanben en occitan, e que se garentisca lo servici oral e escrich en catalan e occitan dins los mitans de la santat.
 
A respècte dels mèdias, se critica que los mèdias publics catalans apliquen la toponimia occitana solament en Aran, e doncas s’exigís que s’aplique lo meteis critèri, d’un biais rigorós e coerent, a la rèsta d’Occitània. En mai d’aquò, se demanda d’aumentar las oras d’emission en occitan dins los mèdias publics, mai que mai ràdio e television, e de promòure l’aument del catalan e de l’occitan dins los mèdias privats, ont las doas lengas patisson una fòrta minorizacion.
 
Enfin, a prepaus de l’educacion, se demanda que i aja la possibilitat d’estudiar l’occitan dins totes los centres d’educacion segondària de Catalonha. Aquel ponch concret foguèt aprovat a l’unanimitat.
 
 


Font: Lo Parlament de Catalonha demanda que se pòsca aprene l’occitan dins los centres d’educacion segondària del país - Jornalet